អាយ៉ៃ ឆ្លើយឆ្លង ! ប្រធានសហព័ន្ធប្រដាល់គុនខ្មែរ លើកឡើថា ខ្លាចមានការកេងប្រយោជន៍ពីការផលិតមាតិការបស់ Admin Page , សារព័ត៌មាន នានា ខណៈ ប្រធានចាប់គូ នៅសង្វៀនគ្រុឌគុនខ្មែរ មានចំណុចខ្លះចង់លើកឡើងដែរ….!

ដោយ TNN កែប្រែចុងក្រោយ ថ្ងៃទី 3 ខែ ឧសភា ឆ្នាំ 2025 14

កីឡា៖ កាលពីថ្ងៃទី២ ខែឧសភា ឆ្នាំ២០២៥ ឯកឧត្ដម ខូវ ឆាយ ប្រធានសហព័ន្ធប្រដាល់គុនខ្មែរ បានសរសេរបង្ហោះថា ៖ ខ្ញុំព្រួយបារម្ភពីការអភិវឌ្ឍន៍និងអនាគតរបស់ក្មេងៗប៉ុន្មាននាក់នេះណាស់។
ជាទូទៅខ្ញុំសង្កេតឃើញថា ភាពជោគជ័យលឿនពេក (វ័យក្មេងពេក) នឹងមិនអាចយូរអង្វែងឡើយ។ ប្រៀបដូចដើមស្វាយដែលមានផ្លែហុចផលលឿនពេក វានឹងក្រិនលែងលូតលាស់ហើយផ្តល់ទិន្នផលតិចតួចជាងដើមដ៏ទៃ។
សំណូមពរអោយមានការយកចិត្តទុកដាក់នឹងថែរក្សាពួកគាត់ដូចតទៅ៖
1- គ្រូៗកុំផ្តោតលើការប្រកួតច្រើនពេក ត្រូវផ្តោតលើការអភិវឌ្ឍន៍ក្មេង កុំដើម្បីចង់ប្រកួត ចង់ឈ្នះ បុកហាត់ហួសកំលាំងក្មេង អាចប៉ៈពាល់ដល់សុខភាពនិងការលូតលាស់របស់ក្មេងៗ
2- ប្រធានក្លឹបត្រូវធានាអោយបាននូវការសិក្សារបស់ក្មេងៗ ដោយមិនអោយការហ្វឹកហាត់ ប៉ៈពាល់ការសិក្សា
3- ស្ថានីយ៍ទូរទស្សន៍ ម្ចាស់កម្មវិធី សូមកុំរៀបចំផ្គូរផ្គងការប្រកួតញឹកញាប់ពេកដល់ក្មេងៗក្រោម15ឆ្នាំ បើអាចគួរតែត្រឹម1ខែ1ប្រកួតបានហើយ
4- គួរតែផ្តល់ថវិកាតម្លៃខ្លួនសមរម្យបន្តិចអោយថ្នាលក្មេងៗ បើអាណិតស្រលាញ់និងចង់ជួយអភិវឌ្ឍពួកគាត់ សូមកុំអោយលុយតិច តែប្រកួតច្រើនញឹកញាប់
5- ឪពុកម្តាយ សូមកុំយកកូនៗអាយុក្រោម15ឆ្នាំជាឧបករណ៍រកប្រាក់ដើម្បីផ្គត់ផ្គង់ខ្លួននិងគ្រួសារ (កុំជម្រុញកូនអោយប្រកួតញឹកញាប់ដើម្បីប្រាក់)
6- សារព័ត៌មាន អេដមីនផេក ម្ចាស់អាខោននានា សូមកុំកេងប្រយោជន៍ពីក្មេងដោយបង្កើតមាតិការព័ត៌មានពីក្មេងៗ ដើម្បីបានLike Share ឬចំណូលពីបណ្តាញសង្គម។

ខ្ញុំពិតជាព្រួយបារម្ភថាការលើកដម្កើងពួកគាត់ជ្រុលពេកអាចនាំអោយពួកគាត់មានមោទកភាពជ្រុល និងភ្លេចខ្លួន ភ្លើតភ្លើន។ តាមការសង្កេត កីឡាករដែលល្បីពីក្មេងៗ ហើយប្រកួតញឹកញាប់តាំងពីអាយុ10ឆ្នាំជាង ដូចជាសឹងតែបាត់ឈ្មោះអស់ហើយ។

បើមានការខុសឆ្គងសូមចូលរួមកែលម្អ និងសូមអភ័យទោសផងបើមានការលើសលួសដល់អ្នកពាក់ព័ន្ធ។

ដោយឡែក លោក ម៉ុល នី ប្រធានចាប់គូ នៅសង្វៀនគ្រុឌគុនខ្មែរ សរសេរ បង្ហោះ លើហ្វេសប៊ុកផ្លូវការ នៅថ្ងៃទី៣ ខែឧសភា ឆ្នាំ២០២៥ ថាទាក់ទងនឹងការលើកឡើងរបស់ ឯកឧត្ដម ខូវ ឆាយ ប្រធានសហព័ន្ធប្រដាល់គុនខ្មែរ ខ្ញុំសូមគាំទ្រ តែក៏មានចំណុចខ្លះចង់លើកឡើងដែរ។

-ដូចជាករណីការប្រកួត១ខែម្ដង ជាទូទៅការប្រកួតរបស់ក្មេងៗគឺយើងរៀបចំទៅតាមកាលកំណត់របស់សហព័ន្ធ ១ខែរៀបចំឲ្យបាន១ប្រកួតឬអាចលើសនេះ។ មួយទៀតទាក់ទងតម្លៃខ្លួនវិញ បច្ចុប្បន្នក្មេងៗថ្នាលដែលប្រកួតនៅស្ថានីយទទកគឺថ្នាក់ដឹកនាំលោកយកចិត្តទុកដាក់ណាស់លោកផ្ដល់ជូនលើសកីឡាករចាស់ៗឬហាត់យូរឆ្នាំដែលមិនសូវល្បីផង។

-តម្លៃខ្លួននេះ ខ្ញុំសូមមិនបញ្ចេញទេ តែចង់បញ្ជាក់ថា វាស្ថិតនៅកម្រិតខ្ពស់មួយដែលអាចទទួលយកបាន។

-ចំណុចទី៦ ឯកឧត្ដម ខ្លាចមានការកេងប្រយោជន៍ពីការផលិតមាតិការបស់ Admin Page , សារព័ត៌មាន នានា ប៉ុន្តែចំណុចនេះខ្ញុំយល់ថា យើងរាល់ថ្ងៃបានពួកគាត់ហ្នឹងហើយជួយផ្សព្វផ្សាយឲ្យបានដល់ពុកម៉ែបងប្អូនយើងនៅតាមបណ្ដាខេត្តឬក៏ក្រុងបានដឹងពីទុក្ខលំបាកឬក៏ចំណុចវិជ្ជមាន-អវិជ្ជមាននានារបស់កីឡាករយើង ហើយនឹងមានការគាំទ្រកាន់តែខ្លាំងឡើង។ ការផ្សព្វផ្សាយកន្លងមកយើងសុទ្ធតែបានដឹងហើយថា វាមានល្អមានអាក្រក់ជៀសមិនផុតទេ តែក៏ឃើញភាគច្រើនគឺផ្សព្វផ្សាយតែរឿងល្អៗ និងទុក្ខលំបាករបស់កីឡាករជាដើម។

-រឿងកាន់តែសំខាន់ទៀតនោះ ការផ្សព្វផ្សាយពីគុនខ្មែរស្ដីពីភាពជោគជ័យ និងការតស៊ូរបស់ក្មេងៗវាក៏អាចជាចលករមួយជួយអូសទាញឲ្យក្មេងៗងាកមកស្រលាញ់គុនខ្មែរ ហើយពួកគាត់អាចចៀសឆ្ងាយពីគ្រឿងញៀន ការដើរលេងប៉ោឡែអីនានា។ ការប្រម៉ូតផ្សព្វផ្សាយរបស់ Admin តាមរយៈរូបភាព ឬវីដេអូ នានាក៏គាត់មានចេតនាល្អដែរ ពេលខ្លះពួកគាត់ចង់ឲ្យក្មេងៗថ្នាលដទៃទៀតដែលមិនសូវប្រឹងហាត់ងាកមកប្រឹងប្រែងហាត់ឡើងវិញ ក្រោយពេលឃើញក្មេងថ្នាលដូចគ្នាតែគេជោគជ័យអីជាដើម។

ជាចុងក្រោយ លោក ម៉ុល នី បញ្ជាក់បន្ថែមថា ក្នុងនាមខ្ញុំជាអ្នកស្រលាញ់ និងគាំទ្រគុនខ្មែរ ព្រមទាំងជាអ្នករៀបចំកម្មវិធីមួយរូប ខ្ញុំពិតជាអរគុណខ្លាំងណាស់ដល់ថ្នាក់ដឹកនាំដែលតែងតែឈឺឆ្អាលរាល់ទុក្ខលំបាករបស់កីឡាករដូច្នេះ។

ភ្នំពេញ៖ លោក ម៉ុល នី ប្រធានចាប់គូ នៅសង្វៀនគ្រុឌគុនខ្មែរ សរសេរ បង្ហោះ លើហ្វេសប៊ុកផ្លូវការ នៅថ្ងៃទី៣ ខែឧសភា ឆ្នាំ២០២៥ ថាទាក់ទងនឹងការលើកឡើងរបស់ ឯកឧត្ដម ខូវ ឆាយ ប្រធានសហព័ន្ធប្រដាល់គុនខ្មែរ ខ្ញុំសូមគាំទ្រ តែក៏មានចំណុចខ្លះចង់លើកឡើងដែរ។