ខេត្តបាត់ដំបង៖ ដោយអនុវត្តតាមបទបញ្ជាផ្ទាល់ពី លោក ឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង និងមានការ សម្រប សម្រួល ទៅលើនីតិវិធីពី ឯកឧត្តម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង ផងនោះ លោក វរសេនីយ៍ឯក ឈឿង គឹមសុង ស្នងការរង ផែនការងារនគរបាលព្រហ្មទណ្ឌ និង លោក វរសេនីយ៍ឯក ចៀក ថានិន នាយការិយាល័យនគរបាលព្រហ្មទណ្ឌកម្រិតស្រាល បានចុះប្រតិបត្តិការ បង្ក្រាប និងឃាត់ខ្លួនជនសង្ស័យចំនួន៣នាក់ ករណីលួចម៉ូតូ ប្រជាពលរដ្ឋនៅក្នុងក្រុង និង បណ្តាស្រុកមួយចំនួនទៀត ក្នុងខេត្តបាត់ដំបង។
កម្លាំងនគរបាលជំនាញ និង ក្រុមអន្តរាគមន៍ បង្ការ បង្ក្រាប បានចុះទៅស្រាវជ្រាវ រហូតឃាត់ខ្លួនបានជនសង្ស័យចំនួន៣នាក់យកទៅឃុំខ្លួនបណ្តោះអាសន្ន នៅសង្នការដ្ឋាន នគរបាល ខេត្តបាត់ដំបង។
ជនសង្ស័យទី១-ឈ្មោះ រុំ ភីរក្ស ហៅ ង៉ា ភេទ ប្រុស អាយុ ៣៣ ឆ្នាំ មានទីលំនៅមិនពិតប្រាកដ ។
ទី២-ឈ្មោះ ភឹម ឌីណា ភេទ ប្រុស អាយុ ៣៩ ឆ្នាំ មានទីលំនៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។
ទី៣-ឈ្មោះ យិន សារ៉ាវុធ ភេទប្រុស អាយុ ៤៦ ឆ្នាំ មានទីលំនៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។
នៅចំពោះមុខសមត្ថកិច្ចជនសង្ស័យឈ្មោះ ភឹម ឌីណា បានឆ្លើយសារភាពថា៖ កន្លងមកខ្លួនបានធ្វើសកម្មភាពលួចយកម៉ូតូ ចំនួន ០៧ គ្រឿង កន្លងមកហើយ។
លើកទី១បានធ្វើសកម្មភាពលួចជាមួយជនសង្ស័យឈ្មោះ យិន សារ៉ាវុធ ដោយលួចបានម៉ូតូស៊េរីចាស់ចំនួន ០២ គ្រឿង។
លើកទី ២ លួចបានម៉ូតូ ម៉ាកហុងដា វេវ អាល់ហ្វា ពណ៍ខ្មៅ ០១ គ្រឿង
លើកទី ៣ លួចបានម៉ូតូ ម៉ាក ហុងដា ឃ្លីក ពណ៍ ក្រហម ១គ្រឿង ស្ថិតក្នុងទឹកដី ស្រុកសង្កែ ខេត្តបាត់ដំបង។
រីឯជនសង្ស័យឈ្មោះ៖ រុំ ភីរក្ស ហៅ ង៉ា បានលួចម៉ូតូ ម៉ាក ហុងដា ឃ្លីក ពណ៌ ស ១ គ្រឿង ស្ថិតក្នុងស្រុកឯកភ្នំ និង លួចបានម៉ូតូម៉ាកហុងដា ឌ្រីម ស៊េរីឆ្នាំ ២០២០ ពណ៌ខ្មៅ ១ គ្រឿងទៀត នៅស្រុកថ្មគោល ខេត្តបាត់ដំបង។
បច្ចុប្បន្នជនសង្ស័យទាំង៣នាក់ខាងលើ ត្រូវបានកំលាំងនគរបាលជំនាញកំពុងរៀបចំ សំណុំរឿង បញ្ជូនទៅសាលាដំបូង ខេត្តបាត់ដំបង ដើម្បីផ្តន្ទាទោសទៅតាមនីតិវីធី៕ដោយ សុខ កុសល
