ភ្នំពេញ៖ នាយកដ្ឋានជំនាញ បានណែនាំមន្ត្រីនគរបាលចរាចរណ៍គ្រប់រាជធានី ខេត្ត អប់រំអ្នកបើកបរអំពីសុវត្ថិភាពចរាចរណ៍ និងរឹតបន្តឹងច្បាប់ចរាចរណ៍ ពិសេសលើកត្តាដែលមានហានិភ័យខ្ពស់ ដូចជាកត្តាល្បឿន កត្តាស្រវឹង។ល។
ពាក់ព័ន្ធការចុះពិនិត្យល្បឿនយានយន្ត នាយកដ្ឋាន បានណែនាំមន្ត្រីនគរបាលចរាចរណ៍ ចុះត្រួតពិនិត្យ នៅលើកំណាត់ផ្លូវ ដែលមានហានិភ័យ គ្រោះថ្នាក់ញឹកញាប់ និងមានបំពាក់ផ្លាកសញ្ញាកំណត់ល្បឿនអតិបរមា។
ជាក់ស្តែង នគរបាលចរាចរណ៍ខេត្តត្បូងឃ្មុំ បានអប់រំណែនាំ ជាប្រចាំ ដល់អ្នកបើកបរ អំពីច្បាប់ចរាចរណ៍ ពិសេសអំពីកត្តាហានិភ័យ នៃការបើកបរល្មើសល្បឿនកំណត់ ការបើកបរក្រោមឥទ្ធិពលនៃគ្រឿងស្រវឹង ។ល។ ប៉ុន្តែ ទន្ទឹមនេះ នៅមានអ្នកបើកបរមួយចំនួនមិនទាន់មានស្មារតីភ្ញាក់រលឹកនៅឡើយ ដោយនៅតែបន្តបើកបរល្មើសល្បឿនកំណត់ មិនអនុវត្តតាមផ្លាកសញ្ញា ពិសេសនៅតំបន់ប្រជុំជន។
ដោយសង្កេតឃើញថា អ្នកបើកបរមួយចំនួននៅតែបំពាន មិនអនុវត្តតាមផ្លាកសញ្ញាកំណត់ នគរបាលចរាចរណ៍ចាំបាច់ត្រូវប្រើវិធានការច្បាប់ ចុះត្រួតពិនិត្យល្បឿនយានយន្ត នៅតាមតំបន់ដែលមានហានិភ័យ ដូចជានៅផ្លូវជាតិលេខ7 ក្នុងភូមិសាស្រ្តស្រុកមេមត់ ដែលជាតំបន់ប្រជុំជនមានផ្ទះប្រជាពលរដ្ឋសងខាងផ្លូវ និងមានបំពាក់ផ្លាកសញ្ញាកំណត់ល្បឿន 60km/h។ ជាការអនុវត្តជាក់ស្តែង សមត្ថកិច្ចឃាត់ពិន័យអ្នកបើកបរលើសល្បឿន 80km/h ដោយមិនអនុវត្តចំពោះករណីល្មើសក្រោមនេះឡើយ។
គោលបំណងនៃការត្រួតពិនិត្យអ្នកបើកបរលើសល្បឿនកំណត់ គឺដើម្បីចូលរួមទប់ស្កាត់ កាត់បន្ថយការគ្រោះថ្នាក់ចរាចរណ៍ និងធានាសុវត្ថិភាពជូនប្រជាពលរដ្ឋ និងអ្នកប្រើប្រាស់ផ្លូវគ្រប់រូប។
យោងតាមទិន្នន័យគ្រោះថ្នាក់ចរាចរណ៍ឆ្នាំ 2024 មានគ្រោះថ្នាក់កើតឡើងចំនួន 2 844 ករណី បណ្តាលឱ្យស្លាប់ចំនួន 1 509នាក់ និងរបួសចំនួន 3 720នាក់។ ក្នុងនោះ កត្តាបើកបរលឿនមានចំនួន 41% ដែលជាមូលហេតុចម្បងបង្កគ្រោះថ្នាក់ខ្ពង់ជាងគេ។
សូមមេត្តាចូលរួមគោរពច្បាប់ស្តីពីចរាចរណ៍ផ្លូវគោកទាំងអស់គ្នា។ សូមអរគុណ!
