តើជំនួបដណ្តើមខ្សែក្រវាត់ រវាង យ៉ាស៊ីន និង ប៊ុន សុធា អាចកើតឡើងដែរឬទេ ខណៈ មេសហព័ន្ធប្រដាល់គុនខ្មែរ ស្នើសុំឲ្យមានការដកចេញ!
កីឡា៖ ប្រធានចាប់គូ នៅសង្វៀនគ្រុឌគុនខ្មែរ លើកឡើងថា ៖ បន្ទាប់ពីឃើញបងប្អូនយើងហ្វេនៗ គាត់មើលឃើញពីកំហុសឆ្គងក្នុងការផ្គូផ្គងរវាង យ៉ាស៊ីន និង ប៊ុន សុធា ថា យ៉ាស៊ីន បានប្រកួតជាប់សប្ដាហ៍គ្នា។
ប្រធានចាប់គូ នៅសង្វៀនគ្រុឌគុនខ្មែរ លោក ម៉ុល នី បន្តថា មែនទែនទៅគូនេះ ពិតជាសូមការអធ្យាស្រ័យ ពីសំណាក់បងប្អូនហ្វេនហ្វេនអ្នកគាំទ្រយើងចេញពីចិត្ត ដ្បិតអីស្ថានីយបានរៀបចំទុកមុនប្រមាណជាចូល២ខែមកហើយ តែជួនអីជាន់គ្នាបែបនេះ ខាងសហព័ន្ធក៏បានស្នើសុំឲ្យមានការដក យ៉ាស៊ីន ដែរ តែដោយសារតែគូនេះ ប៊ុន សុធា គាត់ក៏ត្រៀមខ្លួនរួចហើយ ណាមួយជាការរៀបចំ លេងខ្សែក្រវាត់ថែមទៀត ទើបស្ថានីយ រួមទាំងលោកគ្រូ សេន ប៊ុនថេន បានធ្វើការសម្របសម្រួល ដើម្បីឲ្យ យ៉ាស៊ីន បានចូលរួមប្រកួត។
ក្រៅពីនេះលោក សេន ប៊ុនថេន រួមទាំងយើងក៏បានមើលឃើញថា កាលពីសប្ដាហ៍មុន យ៉ាស៊ីន ប្រើពេលត្រឹម១ទឹកប៉ុណ្ណោះ ដើម្បីផ្ដួល ធន់ បូរី ដូច្នេះមិនមានការឈឺខ្លួនឬមានការប៉ះទង្គិចអីធ្ងន់ធ្ងរទេ។
នេះជាកំហុសឆ្គងមួយ ដែលមិនអាចប្រកែកបាន យើងរីករាយ នឹងទទួលខុស តែក៏សុំចិត្តបងប្អូនមេត្តាអនុគ្រោះ។ ទោះបីជាយ៉ាងណាសហព័ន្ធលោកក៏បានធ្វើការសាកសួរមកកាន់យើង អំពីភាគីទាំងពីរដែរ ដោយកីឡាករទាំងពីរពិនិត្យសុខភាពល្អប្រសើរអាចប្រកួតបាន ដូច្នេះយើងក៏សម្រេចថា មិនរំសាយការប្រកួតនេះទេ ហើយបន្តការប្រកួតធម្មតា។
សហព័ន្ធ លោកយកចិត្តទុកដាក់ណាស់ តែដោយសារហេតុផលដូចដែលបានជំរាបខាងលើទើបមានការអនុគ្រោះ៕
